Allagaatinik misissuineq
Allagaatinik paasiniaaniarluni Nunatta allagaateqarfianukarnissamut nammineq periarfissaqanngikkaanni akiliuteqarluni allagaatinik misissuititsinissaq imissutigineqarsinnaavoq. Tamannali siuaasanik paasiniaanermi atuutinngilaq. Allagaatinik paasiniaanerit taamatut ittut allagaateqarfimmi sulisunut imissutigineqarsinnaanngillat.
Nunatta allagaateqarfiani allagaatinik misissuinissamik imissuteqarneq
Misissuisoqarnissaa kissaatigineqarpat allagaateqarfimmut allakkatigut saaffiginnittoqassaaq, e-mailikkut imaluunniit allakkerisarfikkut. Paasissutissat suut ujarneqassanersut saaffiginnissummi nassuiarneqassapput. Tamatuma kingorna allagaateqarfimmi misissuinissaq ingerlanneqarsinnaanersoq pillugu kalerriisoqassaaq. Misissuinerit atuisumit siumoortumik killilersorneqarluarsimasut nassuiarneqarluarsimasullu kisimik Nunatta allagaateqarfianit aallartinneqarsinnaapput.
Ingerlanneqarneri akillu
Allagaateqarneq pillugu inatsimmi § 27 malillugu allagaatit ilisimatusarnermut aamma tamanut ammasumik atugassanngortinnerinut Nunatta allagaateqarfia akileeqqusisinnaavoq.
Allagaatinik misissuinissamik kissaateqarneq allagaateqarfimmi sulisumit ajornanngitsutut nalilerneqarpat sivisussuseq akialu pillugu missingersuusiortoqassaaq. Nalunaaquttap akunneranut aallartinneqartunut tamanut akunnermut akimik aalajangersimasumik kiisalu allagaatit assilinerinut akiliummik atortullu assilineqartut nassiunneqarnerinut atatillugu nassiussinermi aningaasartuutinut akiliisoqassaaq. Nalunaaquttap akunneranik ataatsimik sivikinnerusumik sulinissamik pisariaqartitsisut pisarneq malillugu apeqquteqaatit akeqanngillat. Taakku tassaanerusarput nunaqarfiit illoqarfiillu tunngavilernerinut ukiut pillugit apeqquteqaatit, najoqqutarisanik qanoq ittunik allagaateqarfiup imaqarneranik assigisaanillu apeqqutit.
Akit akiliutillu
Nalunaaquttap akunneranik ataatsimik sivikinnerusumik sulinissamik pisariaqartitsisut pisarneq malillugu apeqquteqaatit akeqanngillat.
Nalunaaquttap akunneranik ataatsimik sivisunerusumik sulinissamik pisariaqartitsisut nalunaaquttap suliffiusup aallartinneranut ataatsimut 516 kr.-imik akiliisoqassaaq.
Allagaatinik misissuinermut atatillugu assilisaq ataaseq 1 kr.-imik akeqarpoq. Tamatuma saniatigut assilisanut annertunerusunut nalunaaquttap akunneranut suliffiusunut akiliisoqarnissaa piumasarineqarsinnaavoq.
Misissuinerup inerneranut ilaatillugu akiligassaq nassiunneqassaaq.
Nangaassuteqarneq
Immikkut pisut, allagaatit toqqortarineqanngitsunut, misissuinerup aallartinneqartup tamakkiisumik naammassineqarsinnaannginneranik kinguneqarsinnaasut nangaanartoqartinneqarput. Allagaatit eqqortunik tamakkiisunillu paasissutissanik imaqarnerinut Nunatta allagaateqarfia akisussaasinnaanngilaq.